NTNUI

Trondheim, 3.mars 2021

Monja Lien Jakobsen (25) frå Bodø vart tysdag kveld vald til ny leiar for NTNUI. Idrettslaget er det største i Noreg, og tilbyr aktivitet i over 50 ulike idrettar til studentar i Trondheim.

Jakobsen, som også er medlem av styret i Nordland Idrettskrets, har allereie vore ein del av NTNUI-styret i eitt år. Som arrangementsansvarleg i 2020 opplevde ho naturleg nok at mange av arrangementa vart avlyst, men ho har likevel satt sitt sterke preg på foreninga. Viktigast er det nok at ho var ansvarleg for AktivCampus-satsinga i 2020, som går ut på å arrangere ei “tredje fadderveke” på NTNU med fokus på fysisk aktivitet på universitetsområdet. Under Jakobsen si leiing har dette prosjektet vakse til å bli eit nasjonalt prosjekt som i 2021 skal gjennomførast også i andre universitetsbyar.

– Jeg er utrolig ydmyk for den tilliten jeg har fått fra verdens beste klubb. NTNUI er en fantastisk organisasjon, og jeg er stolt av å få lede en klubb som er tuftet på et brennende engasjement og frivillighet, seier Jakobsen.

Monja Lien Jakobsen har også ein allsidig bakgrunn frå leiarverv innen idretten. Ho er styremedlem i Nordland Idrettskrets, og har vore leiar i ungdomsutvalet i ungdomskretsen. Ho har utdanning for “yngre leiarar i idretten” frå Norges Idrettshøgskule. I år skriv Monja Lien Jakobsen masteroppgåve i matematikkdidaktikk ved NTNU.

– Jeg skal sammen med resten av Hovedstyret lose oss så godt som mulig gjennom 2021, og jeg ser veldig fram til å jobbe tett med et dyktig styre. Jeg gleder meg til det kommende året, og håper på mye aktivitetsglede og engasjement blant Trondheims studenter, seier Jakobsen sjølv om sitt nye tillitsverv.

Det nye styret står for mykje kontinuitet frå 2020. Fem av dei ti styremedlemmane går inn i si andre periode, noko som ofte er uvanleg i studentidretten. Øystein Fruseth Christiansen (22), som var leiar fram til årsmøtet i går, går no over i ei ny rolle som nestleiar. Viktig for den økonomiske drifta av idrettslaget er det også at hovudkasserer Sven Andreas Nygaard (29) og økonomiansvarleg Idun Eide Stavseng (20) begge går inn i ei ny periode i sine verv. Mats Finsås (25), som har vore informasjonansvarleg i hovudstyret, vart også attvald til ei ny periode.

Kontinuiteten i klubbdrifta styrkast ytterlegare ved at tre nye styremedlem har vore med i interrimsstyret i NTNUI sidan september. Joakim Haneberg Johansen (31) har også lang erfaring som leiar av NTNUI Koiene. Julie Heiervang Johnsen (24) er inne i sitt tredje år i volleyballstyret, medan Cecile Ulrikke Grøndal (27) har sterk økonomibakgrunn i tillegg til sitt tidlegare verv i interrimstyret.  Elles er Stine Bertelsen (21) og Stian Koch (21) også nye i hovudstyret. Dei to har idrettsbakgrunn frå høvesvis symjing og tennis, og Koch har mellom anna vore kasserer i tennisgruppa. 

Om NTNUI

NTNUI er Norges største idrettslag. Idrettslaget ble stiftet i 1910 og har drevet med idrett i over 110 år. Laget har over 50 ulike idrettsgrupper. NTNUI ønsker å spre mangfold, samhold og idrettsglede blant studentene i Trondheim. Sammen skaper NTNUI de beste øyeblikkene i studietiden. 

Vi har over 14 000 medlemmer og har kontorer på Gløshaugen i Trondheim.  

Har du flere spørsmål eller ønsker å snakke med Monja Lien Jakobsen kan du kontakte kommunikasjonsrådgiver Oskar Hope-Paulsrud på e-post oskar.paulsrud@ntnui.no eller telefon +47 902 66 958. Ønsker du portrettbilde av Monja Lien Jakobsen finner du det her (Gjenbruk etter CC BY 4.0, Foto: Fotografens navn / NTNUI Blits/(fotografen står oppgitt i mediearkivet)

Tekst: Vegard Buset | NTNUI Blits | Foto: Eivind Jølsgard

Opninga torsdag kveld vart ein stor suksess med over 100 bookingar – leiar Stian Rakke vil gjerne ha med fleire studentar som frivillige

Utleige av turutstyr

Etter nær eitt år med låg aktivitet, opna NTNUI Bumerang endeleg for fullt igjen torsdag kveld. Dei driv utleige av mellom anna ski- og  turutstyr, og legg slik til rette for at studentar kan få oppleve naturen rundt Trondheim. Spesielt utvekslingsstudentar som enten har lite skierfaring frå før eller ikkje har tatt med seg utstyr heimefrå, er flittige brukarar av tilbodet. Leiar for Bumerang, Stian Rakke, fortel at etterspurnaden er valdsamt stor.
—  Hadde vi hatt dobbelt så store lokaler og dobbelt så mange frivillige, kunne vi nok ha leigd ut dobbelt så mykje, konstaterer han.

Utvekslingsstudentar som frivillige

Rakke har vore leiar i Bumerang heilt sidan starten i 2014. Denne våren har 20 studentar meldt seg som frivillige, alle utvekslingsstudentar. Da er det klart at ikkje alle har like god kjennskap til langrennsski frå før, men Rakke er imponert over kor fort dei frivillige lærer. Han skildrar eit tett fellesskap i Bumerang, der skiopplevingar og meistring er med på å knytte dei frivillige saman.
—  Dei frivillige gjer ein kjempejobb og vi er like mange som normalt, sjølv om det er færre utvekslingsstudentar i Trondheim enn normalt i år, seier Rakke.

Leiaren kunne likevel ynskt seg nokre fleire norske studentar også, det vil gjere det lettare å ha kontinuitet i drifta av organisasjonen. Han fortel at han har fått veldig mykje ut av sine møter med internasjonale studentar gjennom Bumerang. Mellom anna har han lært mykje av deira perspektiv, og fått tatt del i deira opplevingar når dei kjem til Noreg, prøver langrenn for første gong og utviklar nye venskap. Samstundes understrekar leiaren at Bumerang leiger ut til alle studentar, også norske.
—  Dermed kunne det vore greitt å ha fleire norske frivillige også, for å betre spegle studentgruppa vi leiger ut til, seier han.

Mål om trivsel, idrett og venskap

NTNUI Bumerang har tidlegare fått stor merksemd for sitt inkluderande arbeid, spesielt for deira bidrag til at utvekslingsstudentar finn seg til rette og kjem inn i sosiale miljø i Trondheim. I 2019 fekk dei Buddy-prisen av NTNU, for å fremme aktivitet og inkludering i studentmiljøet. Og det er nettopp dette som er målet til Bumerang, kan Rakke stadfeste.
—  Vårt mål er å leggje til rette for trivsel og idrett gjennom utleige av utstyr. Dette legg til rette for at fleire får ta del i arenaer for å danne venskap.

Må booke utstyr på nett på førehand

Opninga torsdag viste også at verda har forandra seg sidan Bumerang sist kunne drive for fullt. Godt strukturerte køer og presise smitteverntiltak vart fulgt, og leiaren skryt av dei som var til stades på opninga. Det er gjort endringar i både rutiner og opningstider for å tilpasse seg til situasjonen. Alle bookingar må gjerast på førehand via nett, og utstyr må hentast i opningstida enten torsdag eller fredag kveld. Innlevering av utstyr skjer no kun måndagar, for å sikre nok tid til å vaske utstyr før det skal delast ut igjen. Men skal ein dømme ut frå opninga torsdag, kan ein trygt seie at eitt år med pandemi korkje har øydelagt turgleda til Trondheimsstudentane eller det store engasjementet til Stian Rakke og NTNUI Bumerang. Det vil nok bli skapt fleire turopplevingar og venskapsband på grunn av dei også i 2021.


Her kan du lese meir om Bumerang og sjå akkurat kva utstyr dei tilbyr.

Tekst: Vegard Buset | NTNUI Blits | Foto: NTNUI Orientering

Før helga vart landslaga i orientering tatt ut. Med grøne auge var uttaka hyggeleg lesing, heile sju utøvarar frå NTNUI kom med. Desse fordeler seg på i alt tre ulike landslag.

NTNUIar på A-landslaget

23-årige Audun Heimdal er den aller sterkaste løparen i det store orienteringsmiljøet i NTNUI. Han er verdsmeister i stafett i student-VM, og har også delteke i fleire verdscupkonkurransar. No har han fått plass på A-landslaget i orientering, som ein av kun seks norske herreløparar. Sportsleg leiar i NTNUI Orientering, Rasmus Theisen, fortel at det er tre år sidan sist ein NTNUlar kom med på A-landslaget, og skryt av Heimdal. Heimdal har også individuelle medaljar frå junior-VM. Dei siste åra har han kombinert studiene med orienteringssatsing i NTNUI, og får no altså plass på A-landslaget.

Rekrutteringslandslag for unge utøvarar

Som i mange andre idrettar er steget frå juniornivå til høgt internasjonalt nivå stort. Eitt av grepa orienteringsforbundet har gjort, er innføringa av rekrutteringslandslaget “Next Generation”. Utøvarane der er normalt under 25 år, og får tett oppfølging av treningskvardagen av landslagsleiinga. Dei deltek også på dei fleste samlingane til A-landslaget. Her i Trondheim har gruppa eit samarbeid med Olympiatoppen på Granåsen for å planlegge og gjennomføre mellom anna: fysiske testar, styrketrening og ernæringsrettleiing. I år har fire utøvarar frå NTNUI blitt tatt ut på dette laget.

—Viktig for treningskvaliteten

Ein av desse er Ingrid Lundanes (22), ein anna NTNUIar som har vore i verdstoppen for juniorar. Ho har mellom anna individuell medalje i junior-EM på merittlista, og var med på det norske laget som tok gull på stafett i student-VM. Lundanes var også med på rekruttsatsinga i fjor, og fortel at det å vere med på rekruttlandslaget er viktig for treningskvaliteten i kvardagen.
— Gjennom rekrutteringslandslaget får vi vere med på treningssamlingar med god matching, så det betyr mykje for meg som utøvar å vere med på dette laget, seier ho.

Få konkurransar i 2020

Både for Heimdal, Lundanes og dei andre orienteringsløparane har det sjølvsagt vore ein annleis sesong. Vårsesongen vart avlyst, og det same vart alle internasjonale konkurransar. Utøvarane fekk dermed ikkje høve til å konkurrere internasjonalt, og teste korvidt dei har klart å ta enda eitt steg mot verdstoppen.
— Dette er veldig synd, for det er snakk om unge utøvarar i stor utvikling her, seier sportsleg leiar Theisen.

Han er likevel optimistisk på utøvarane sine vegne, og trur utøvarane frå NTNUI vil utvikle seg ytterlegare gjennom det gode landslagstilbodet.

Ane Dyrkorn også inn på landslaget

Optimismen delast også av Ane Dyrkorn, som er ny på rekrutteringslandslaget i år. Til NTNUI Orientering seier ho at ho synest det er veldig stas at landslagssleiinga har trua på ho.
– Eg vart ganske overraska då eg vart ringt opp, for eg hadde ikkje tenkt så mykje over moglegheitane for å kome med, seier Dyrkorn.

Glad vart ho sjølvsagt likevel. No ser Dyrkorn fram til å bli landslagsutøvar, og gir uttrykk for det kjem til å verte både utfordrande, spanande og utviklande å vere del av landslaget i orientering.

— 1 000 000 meter på romaskin

Tekst: Vegard Buset | NTNUI Blits | Foto: NTNUI/Nils Dittrich

I samband med TV-aksjonen for plastfritt hav har NTNUI Roing eit verdsrekordforsøk på gang. Klarer dei å ro ein million meter på romaskin i løpet av 64 timar utan at maskina stoppar, og samtidig samle inn pengar til TV-aksjonen?

Vil slå verdsrekorden

Torsdag kveld går startskotet for det som truleg er NTNUI sitt mest ambisiøse bidrag til TV-aksjonen i år. 40 roarar frå NTNUI Roing står klare for den lengste romaskinstafetten dei nokon gong har delteke på. Olav Katle Fleten frå rogruppa fortel at den noverande verdsrekorden er på 64 timar og 10 minutt samanhengande roing, og at det er Peterborough Rowing som har den. Målet er å slå denne rekorden, altså å ro 1 million meter på kortare tid enn den engelske roklubben klarte.

Strenge krav for godkjent rekord

Det er ikkje så lett å få godkjent ein verdsrekord, og det stillast strenge krav til rekordforsøket. Det viktigaste er at romaskina aldri stoppar i løpet av dei mange timane forsøket pågår. Strategien rogruppa har lagt er å leggje opp til relativt korte etapper, på om lag 5-10 minutt kvar. Med andre ord vil effektive vekslingar bli ein nøkkelfaktor i forsøket på å slå rekorden. Sidan rekorden er i mixklassa, er det også krav om minst ein tredjedel menn og ein tredjedel kvinner på laget. Olav Fleten seier at akkurat dette kravet går veldig fint, sidan det er 20 menn og 20 kvinner som deltek for NTNUI.

Samarbeid med TV-aksjonen

Dei siste åra har P3-aksjonen på Solsiden fått stadig større merksemd under TV-aksjonen, spesielt i målgruppa for ungdom, unge vaksne og studentar. Også i år, til tross for pandemien, er NRK P3 på plass med sending frå Solsiden, og Fleten kan fortelje at rogruppa samarbeidar med P3-aksjonen om rekordforsøket. Romaskina vil bli plassert like ved studioet, så det verkar som det kan bli fleire innslag derfra undervegs.
— Og vi får nok sett nokre av programleiarane på romaskina også, hintar Fleten.

Vi får nok sett nokre av programleiarane på romaskinen

Olav Katle Fleten – NTNUI Roing

Pengeinnsamling via Spleis

Rekordforsøket startar torsdag kveld klokka 22.00. Dermed veit ein før klokka 12 på søndag formiddag korleis det går. Men for rogruppa er det ikkje berre rekorden som er viktig denne gongen.

— Vi samlar også inn pengar til TV-aksjonen, og har oppretta ein eigen Spleis, fortel Fleten. Der kan kven som helst sende pengar, som vil bli overført direkte til TV-aksjonen og kampen mot plastfritt hav etter rekordforsøket. Heile forsøket sendast også direkte på nett på roing.no, så det er gode moglegheitar for publikum til å få med seg korleis dei ambisiøse NTNUIarane gjer det!

NTNUI dykkargruppa driv ikkje berre med populære dykkerturar og -kurs, dei har også havryddedugnad fire gongar i året. I helga var dei på Solsiden, og dei er godt nøgd med korleis det gjekk.

Tekst: Vegard Buset | NTNUI Blits | Foto: NTNUI Dykkargruppa

Fjerna søppel frå havet

Laurdag gjennomførte NTNUI dykkargruppa “Ocean Clean Up” i Dokkbassenget på Solsiden. Normalt gjer gruppa dette fire gongar i året, men grunna koronapandemien hadde gruppa ikkje fått reinska opp sidan mars. 

— Vi fjerner i grunn alt vi kan finne av søppel, det seg vere plast, syklar eller anna rusk, seier Fei Song, som er dugnadsansvarleg i dykkargruppa.

Stort oppmøte

Aksjonen laurdag hadde godt oppmøte av frivillege frå dykkargruppa, og 25 ivrige NTNUIarar bidro til å gjere hamna på Solsiden litt reinare. Deltakarane fordelte seg på 11 dykkarar og 14 frivillege på land. Fleire av deltakarane uttrykte at dei synest det er naturleg at dykkargruppa bidreg til reinare hav, sidan dei sjølv brukar havet så mykje i sin aktivitet. Song understreka på si side at NTNUI og gruppa står for mykje meir enn kun idrettsleg aktivitet, gruppa og medlemmane kjenner også på eit ansvar for miljøet og for havet.

TV-aksjonen har også fokus på hav i år

“Ocean Clean Up” gjennomførast normalt fire gongar i året, og staden det ryddast på alternerar mellom Ila, Solsiden og Skansen. Prosjektet til dykkargruppa er ikkje knytt til årets TV-aksjon, som dreier seg om plastfritt hav, sjølv om dei same måla delast. TV-aksjonen gjennomførast i år 18.oktober, og har fokus på å forbetre avfallssystema i Søraust-Asia, med eit mål om å redusere plastutsleppa med 7000 tonn årleg. Dykkargruppa sin tradisjonsrike aksjon fokuserer meir på å fjerne avfall som allereie er i havet lokalt, men dugnadsansvarleg Song seier gruppemedlemmane også skal stille som bøssebærarar under TV-aksjonen.

Nøgd med haustens aksjon

Og “fangsten” frå aksjonen i helga vart stor nok til å fylle ein heil tilhengar, som vart frakta til idrettsbygget på Dragvoll. Derfra tok Trondheim Renholdsverk over avfallet, og sørga for at det vart ivareteke på ein langt betre måte enn ved å bli kasta i havet. Dugnadsansvarleg Song var godt nøgd med resultatet, og at dykkargruppa har bidrege til å gjere havet rundt Trondheim litt reinare.

På det gamle NTNUI-kontoret hang det ein lett formanande lapp med påskrifta “NTNUI er grøne, så la oss oppføre oss grønt”. Det er lett å slå fast at dykkargruppa lukkast med å drive i tråd med dette prinsippet, og er medvite at både studentar, idrettslag og studentidrettslag bør ta og føle ansvar for miljøet og samfunnet.

Fleire bilete frå aksjonen finn du her.

AktivCampus og volleyballgruppa samarbeidde om det første arrangementet i årets mest aktive veke på NTNU. Vi har prata både med arrangørar og deltakarar om turneringa.

Tekst: Vegard Buset | NTNUI Blits | Foto: Vebjørn Jokstad

Full påmelding

Søndag starta årets linjeforeningsleikar med sandvolleyballturnering i Dødens Dal. Om lag 120 spelarar frå 16 ulike lag deltok, og det var fleire lag som ikkje fekk plass av smittevernomsyn.
—  Ein stor suksess, oppsummerar Monja Lien Jakobsen turneringa som.
Ho er prosjektleiar for AktivCampus, og kunne konstatere at litt gråvær ikkje hindra studentane i å kose seg i Dødens Dal. På bana var innsatsen på topp etter dei to første faddervekene, og no starter altså aktivCampus, “den tredje fadderveka”.

Artig å delta

Hanna Skeidsvoll, ny student på industriell design, var mellom dei mange deltakarane i turneringa. Laget Sirkus Leonardo hadde fått namnet sitt frå linjeforeninga (Leonardo), og stilte opp i badekåper. Skeidsvoll forklarer det ukonvensjonelle draktvalet med at dei ynskja å spele i noko enkelt og uformelt, men samstundes noko fleksibelt nok til å kunne spele ball. Ho fortel at laget består av både fadrar og nye studentar frå linjeforeninga, og at dei har hatt trivelege fadderveker. Volleyballturneringa skildrar ho også som artig, sjølv om dei fleste kampane har enda med tap.

Kan også melde seg på som enkeltperson

Dei fleste laga på turneringa er linjeforeningslag eller faddergrupper slik som Sirkus Leonardo. Men det er også mogleg å melde seg på volleyballturneringa og andre arrangement i leikane som enkeltperson. Prosjektleiar Jakobsen fortel at tre av laga som deltek er samansett av personar som har meldt seg på enkeltvis. Dette blir også mogleg vidare gjennom veka. Når det gjeld Hanna Skeidsvoll og resten av laget hennar, har dei enno ikkje bestemt seg for om dei skal delta på meir gjennom veka. Men ho seier at inntrykket hennar av linjeforeninga er at det er godt miljø på tvers av trinna, og at dette absolutt var eit kjekt arrangement å delta på.

— Viser kor viktig Dødens Dal er

Til stades på arrangementet var også leiar i NTNUI, Øystein Fruseth Christiansen. Han er full av godord om arrangementet og aktivCampus.

— Gode arrangement som dette viser kor viktig anlegga i Dødens Dal er for studentmiljøet i Trondheim, seier leiaren.

Som så mange andre er han godt nøgd med korleis aktivCampus bidreg til å skape aktivitet der studentane er, og verkeleg er med på å gjere universitetsområdet meir levande. Og skal ein dømme ut frå denne opningsturneringa, har studentane i Trondheim mykje energi igjen, før resten av linjeforeningsleikane og aktivCampus skal arrangerast den neste veka.

Heile programmet for aktivCampus finn du her.

I tråd med den gradvise opninga av samfunnet, har også stadig fleire grupper i NTNUI byrja opp att med aktivitet. Rumpeldunkgruppa er ei av gruppene som dei siste vekene har vore kreative, og tenkt ut sosiale treningsformer i tråd med retningslinjene frå FHI.

Tekst: Vegard Buset | NTNUI Blits | Foto: Oskar G. Paulsrud

Grupper på fem

— Vi har dei siste vekene hatt treningar i grupper på opptil fem, så det har sjølvsagt vore veldig annleis frå det vi vanlegvis gjer, fortel trenar Amund Kulsrud Storruste.

Han fortel at treningsopplegget har fokusert spesielt på fotarbeid og løpsteknikk, sidan dette er gode øvingar ein kan gjere med god avstand til andre. Inspirasjon til øvingane har han mellom anna funne på nettet, der det er mange andre trenarar som er i same, nye situasjon.  

— Dette har vore ein god moglegheit til å trene på ting vi vanlegvis nedprioriterer, er konklusjonen til Veslemøy Selvik. 

Ho er leiar i NTNUI Rumpeldunk, og glad for at gruppa igjen kan tilby aktivitet til sine medlemmar. Trenar Storruste fortel at sjølv om ikkje alle medlemmane var like motiverte for denne forma for trening, verka det som alle var godt fornøyde med å kunne treffast igjen. Han skildrer vidare hurtige retningsforandringar og akselererasjonar som noko av det gruppa gjorde mykje av i vekene dei kun kunne trene fem personar saman. Nokre styrkeøvingar vart også lagt inn i treninga, og desse øvingane vart styrt av ein fysioterapeut som spelar på laget.

EM Utsatt

Ein kan trygt seie at våren vart annleis enn planlagt for rumpeldunkgruppa, som for så mange andre. Normalt skulle laget ha delteke i både NM og EM i løpet av våren. Spesielt EM i Belgia var å rekne for eit høgdepunkt. Trenaren fortel at billettar og overnatting var bestilt, og at laget gleda seg stort til å delta. NTNUI har oftast enda topp ti i EM, med eit naturleg høgdepunkt i semifinaleplassen i 2017. No får dei ikkje sjansen til å gjenta denne prestasjonen i år.

Les mer om NTNUI Rumpeldunk

Selvik og Storruste er imidlertid samde om at det no handlar om å gjere det beste ut av situasjonen. Dei er glade for å ha starta opp att aktivitet, og seier begge at rumpeldunkgruppa vil følgje råd og retninglinjer frå FHI framover. Sidan torsdag 7.mai har det vore lov å trene i grupper på 20, så lenge ein held minimum ein meter avstand. Men gruppa ser likevel ikkje på det som sannsynleg å kunne trene “normalt” i den komande tida.
— Vi driv med ballsport, og gler oss over at det no er opna opp for å kunne kaste ballen til kvarandre igjen, seier Storruste,  dei første vekene måtte vi bruke andre løysingar med kvar sin ball.

Kjekt å kunne trefst igjen

Til tross for mindre varierte treningar enn vanleg, har i alle fall medlemmane i rumpeldunkgruppa kunne trefst igjen. Både norske og internasjonale studentar har møtt opp i Dødens Dal, og delteke i dette organiserte treningstilbodet. NTNUI si rolle som sosial arena og møtepunkt er ikkje akkurat mindre viktig enn vanleg i denne spesielle tida. Og framover kan altså enda fleire trefst, i tråd med dei nye retningslinjene. Kvardagen blir meir og meir normalisert, men idrettsgleda og fellesskapet er i alle fall til stades, akkurat som før.